Yangi uzilgan sabzavotlarga dastlabki ishlov beriladi. Ishlov berishda quyidagi jarayonlar olib boriladi: ajratish, yuvish, tozalash va maydalash. Sabzavotlarni ajratishda chirigan, lat yegan, bo‘laklanganlari olib tashlanadi. Shuningdek, sabzavotlar o‘lchami, pishish darajasi va ulardan qanday taom tayyorlanishiga qarab ajratiladi. Mikroorganizmlarning urug‘lanishini pasaytirish maqsadida sabzavotlar (ular bilan birga qazib olingan har xil chiqindilardan) tozalanadi (ya’ni, qum, tuproq, chang va toshchalari yuvib tashlanadi). Yuvib tozalangan sabzavotlar po‘stidan ajratiladi.