Maʼnaviyatni shakllantiradigan asosiy mezonlar “Maʼnaviyat asoslari” fan sifatida shakllanayotgan bir sharoitda uning kategoriyalarini (tushunchalarini) aniqlash, bir tizimga keltirish olimlarimiz oldida turgan asosiy vazifalar hisoblanadi. Chunki, uning asosiy kategoriyalari va rivojlanish qonuniyatlari aniqlanmagan hamda maʼlum bir tartibga solinmas ekan u maqomiga ega bo’la olmaydi. Albatta, maʼnaviyat barcha ijtimoiy-gumanitar fanlar tizimida eng “yosh” bo’lganligi sababli uning tushunchalarini bir tizimga keltirish murakkab hisoblanadi. Chunki, uning ayrim tushunchalari falsafa, es­tetika, etika, dinshunoslik va boshqa fanlar bilan ham uyg’unlashib ketgan, bu tabiiy hol. Zero, maʼnaviyatni ularning uyg’unligisiz tasavvur ham qilib bo’lmaydi.