Yoshlarga oid davlat siyosati — bu davlat tomonidan yosh avlodning har tomonlama rivojlanishi, ularning ijtimoiy-iqtisodiy faolligini oshirish, huquq va manfaatlarini himoya qilish, ta’lim, bandlik, sog‘liqni saqlash, bo‘sh vaqtni mazmunli tashkil etish kabi sohalarda amalga oshiriladigan tizimli va uzluksiz chora-tadbirlar majmuasidir. Ushbu siyosatning asosiy mazmuni — yoshlarni jamiyatda munosib o‘rin egallashga tayyorlash, ularning salohiyatini ro‘yobga chiqarish va davlat taraqqiyotiga faol hissa qo‘shishini ta'minlashdan iborat. Mohiyati esa — yoshlar manfaatlarini ko‘zlab siyosiy, huquqiy, iqtisodiy va ijtimoiy mexanizmlarni ishga solgan holda, ularni qo‘llab-quvvatlash, davlat va jamiyat rivojida faol ishtirokini ta’minlashga qaratilgan.