Odamning atrof-muhit bilan bo‘lgan o‘zaro munosabatlari va bu munosabatlar jarayonida shakllanadigan bilish faoliyati inson psixologiyasining asosiy yo‘nalishlaridan biri hisoblanadi. Idrok (persepsiya) — shaxsning atrofdagi olamni va undagi hodisalarni bevosita va yaxlit holda qabul qilish jarayoni bo‘lib, insonning ijtimoiy va shaxsiy hayotida muhim rol o‘ynaydi. Bu jarayon faqat sezgilarning yig‘indisi emas, balki insonning ilgari olgan bilimlari va tajribasiga asoslangan murakkab psixologik mexanizm hisoblanadi.Idrokning mohiyatini chuqur anglash, uning mexanizmlarini o‘rganish, shuningdek, idrok illyuziyalari kabi qiziqarli hodisalarni tadqiq qilish zamonaviy psixologiyada keng muhokama qilinayotgan mavzulardan biridir. Illyuziyalar — bu idrokdagi subyektiv buzilishlar bo‘lib, ular tashqi muhitni noto‘g‘ri talqin qilish natijasida yuzaga keladi. Bunday hodisalar inson idrokining cheklovlarini va unga ta’sir etuvchi omillarni aniqlashga yordam beradi.