Ijodkorlik inson tafakkuri va amaliy faoliyatida yangilik yaratish, mavjud narsalarga o‘ziga xos yondashish, noodatiy yechim topa olish qobiliyatidir. Psixologiya va pedagogika fanlarida ijodkorlik shaxsning muhim sifatlaridan biri sifatida qaraladi. Ijodkorlik insonni standart fikrlashdan chiqaradi va noodatiy yondashuvga undaydi. Psixologlar ta’kidlashicha, ijodkorlik tafakkurning elastikligi, mustaqilligi va originalligiga bog‘liq bo‘ladi. Pedagogik nuqtai nazardan, ijodkorlik – bu ta’lim-tarbiya jarayonida o‘quvchilarning bilim olishga bo‘lgan qiziqishini kuchaytiruvchi, ularning bilimni mustaqil izlashiga va yangilik yaratishga yo‘naltiruvchi jarayondir.