Insonning psixologik va fiziologik rivojlanishi murakkab va uzluksiz jarayon bo‘lib, uning har bir bosqichi alohida e’tiborni talab qiladi. Ayniqsa, kichik maktab yoshidagi bolalarning anatomik va fiziologik xususiyatlari ta’lim-tarbiya jarayonida alohida o‘ringa ega. Bu yosh davrida o‘quvchilarning suyak-muskul tizimi, asab tizimi va ichki organlarining rivojlanishi hali yakunlanmagan bo‘lib, ular yuqori darajada noziklik va sezuvchanlikka ega bo‘ladi. Mazkur jarayonlarni chuqur tushunish va ta’lim-tarbiyaga mos ravishda yondashish nafaqat o‘quvchilarning o‘zlashtirish darajasini oshiradi, balki ularning sog‘lom jismoniy va psixologik rivojlanishini ham ta’minlaydi. Bugungi kunda mamlakatimizda yosh avlodning har tomonlama rivojlanishi uchun keng imkoniyatlar yaratilmoqda. Prezidentimiz tashabbuslari bilan ta’lim tizimini isloh qilish jarayonida bolalarning sog‘lig‘ini saqlash, jismoniy rivojlanishini ta’minlash, ularning anatomik va fiziologik xususiyatlarini hisobga olib, ta’lim-tarbiya jarayonini tashkil etish muhim vazifalardan biri sifatida belgilangan. Shu bois ta’lim tizimida kichik maktab yoshidagi o‘quvchilarning o‘ziga xos xususiyatlarini chuqur o‘rganish, bu boradagi zamonaviy ilmiy yondashuvlarni amaliyotga tatbiq etish bugungi kunda dolzarb ahamiyat kasb etmoqda. Mazkur taqdimot ishida kichik maktab yoshidagi bolalarning anatomik-fiziologik xususiyatlari, ularning jismoniy va psixologik rivojlanishi jarayoni, shuningdek, bu xususiyatlarni hisobga olgan holda ta’lim-tarbiya jarayonini tashkil qilish bo‘yicha tavsiyalar ko‘rib chiqiladi. Tadqiqotning asosiy maqsadi kichik maktab yoshidagi o‘quvchilarning anatomik-fiziologik rivojlanishini ta’lim jarayonida hisobga olishning zaruriyatini ochib berishdan iborat. Shu bilan birga, o‘quvchilarning rivojlanish jarayonini sog‘lomlashtirishga oid tavsiyalar ishlab chiqiladi.