KIRISH Mavzuning dolzarbligi:Psixologik xizmat-ijtimoiy psixologik muammo sifatida talqin qilinar ekan, barcha rivojlangan mamlakatlardagi kabi, Oʼzbekistonda ham mazkur psixologik xizmat muammosining qay tariqa va qanday ilmiy-tashkiliy asoslarda bartaraf etilayotganligini oʼrganish, tahlil qilish va talqin qilish muhim ahamiyat kasb etadi. Chunki, Respublikada psixologik xizmatga oid olib borilayotgan nazariy-ilmiy va amaliy-uslubiy tadqiqotlar koʼlamiga maʼlum tartibda baho bermay turib, Oʼzbekistonda psixologik xizmatni yanada takomillashtirish va rivojlantirish masalasi haqida fikr mulohaza yuritib boʼlmaydi. Oʼzbekistonda psixologik xizmat tarkib topishining dastlabki ildizlari va intihosi asrimizning 30-yillaridagi pedalogiya fani va pedalogik xizmat faoliyatlariga borib taqaladi. Аrxivdan olingan maʼlumotlarga qaraganda, mazkur yillarda taʼlim jarayonini tashkil etish va rivojlantirish oʼquvchi va oʼqituvchi faoliyati bilan bogʼliq psixologik omillarga asoslangan va bu talaygina yaxshi natijalar ham bergan. Pedagogik psixologiya yoʼli bilan bajariladigan barcha ishlar maktabda faqat pedagogik yondashuvlar asosidagina amalga oshirildi. [1]Shunday boʼlsa-da, Oʼzbekistondagi umumtaʼlim tizimi bilan bogʼliq izlanishlar va tadqiqotlar toʼxtab qolgani yoʼq. Аyniqsa, P.I.Ivanov, V.E.Chudnovskiy, M.G.Davletshin, M.Vohidovlar tomonidan ishlab chiqilgan qator ilmiy va metodik tavsiyalar maktabda psixologik xizmat tatbiqini yaratish uchun maʼlum darajada asos boʼlib keldi. Binobarin, 70-80-yillarda Toshkent Davlat Universiteti psixologiya kafedrasi olimlari tomonidan ijtimoiy psixologik tadqiqotlarning hayotga tatbiqini amalga oshirish maqsadida talaygina mehnat jamoalarida psixologik xizmat tizimi joriy qilindi va Respublikamizda ilk bor qator mehnat va ishlab chiqarish jamoalarida inson va mehnat faoliyati, shaxs va shaxslararo munosabatlar, ishchi va rahbar, ruhiyat va rentabellik, rahbar va jamoa psixologiyasi bilan bogʼliq ilmiy-amaliy ishlar olib borildi. Ijtimoiy turmushning tobora inson ezgu niyati bilan muvofiqlashtirish maʼlum jihatdan psixologik xizmatni yoʼlga qoʼyish va uni takomillashtirishga bogʼliq. Shuni alohida taʼkidlab oʼtish joizki, amaliy, xususiy ahamiyatga ega boʼlgan muommolarning yechimi bilan shugʼullanish uning nazariy ahamiyatini kamaytirishga olib kelishi mumkin. Xuddi shu sababdan amaliyot jarayonida nazariy xususiyatli masalalarni oʼrganish, yangi maʼlumotlar olishga puxta negiz hozirlasa, ikkinchi tomondan tatbiqiy jihatlarni takomillashtirishga imkon yaratadi. Psixologik ayniyatga aylangan fikrlashning amaliy va nazariy tarkiblarining uygʼunlashuvi progress, sivilizatsiya mohiyatini yangilik alomatlari bilan kengaytirishga zamin hozirlaydi. Shuning uchun amaliy tafakkur oʼta sodda degan baholash mezonidan voz kechish, uning imkoniyati, mahsuldorligi yuksakligiga ishonch hosil qilgan holda yoʼl tutish maqsadga muvofiq. Insoniyat tomonidan toʼplangan bilimlarni, koʼnikma hamda malakalarni ijtimoiy turmushga tadbiq etish bilan chegaralanib qolmasdan, balki mazkur jarayonlarda yangicha yondashuv, original munosabat, vaziyatga mos tushuvchi eksperimental texnologiyani qoʼllash mutlaqo yangi nazariy maʼlumotlarni egallashga zarur shart-sharoitlar tugʼdirishi ehtimol. Holbuki shunday ekan, psixologik xizmat koʼrsatish jarayonida hal qilinmagan psixologik, ijtimoiy psixologik nazariy muammolarni tadqiqot qilish ikki yoqlama stimul, ikki yoqlama taʼsir, ikki yoqlama intensiv fikrlash, inson-tabiat muhit kontekstidagi masala yechimiga muayyan aniqlik kiritishga muvaffaq boʼlgan boʼlar edi. Kurs ishining maqsadi: Ijtimoiy sohalarda psixologik xizmatni tashkil etilishi,mazmuni va usullarini yoritish. Kurs ishi obyekti: Ijtimoiy sohalarda psixologik xizmat Kurs ishi predmeti: Ijtimoiy sohalarda psixologik xizmat o’ziga xos xususiyatlari. Kurs ishining vazifalari: Psixologik xizmatning paydo bo‘lish tarixini o‘rganish;Psixologik xizmatning maqsadi,vazifalari va usullari yoritish;Ijtimoiy sohalarda psixologik xizmat tashkil etish muammolari taxlil qilish;Ijtimoiy sohalarda psixologik xizmatning klassik va zamonaviy yo‘nalishlarini ko‘rib chiqishdan iborat. Kurs ishining tuzilishi: Mazkur kurs ishi kirish, 2 bob, 4 paragraf, xulosa va foydalanilgan adabiyotlar ro‘yxatidan iborat.