"Sun’iy intellekt” nima ekanligini tushunish va unga ta’rif berishdan oldin, avvalo “Intellekt” o‘zi nima ekanligini aniqlab olishimiz kerak. Bu inson miyasining ma’lumotlarni qabul qilish, eslab qolish, qayta ishlash va xulosa qilish, tajribalardan o'rganish, turli sharoitlarga moslashish, o‘qish va izlanish orqali bilimlarga ega bo‘lish hamda ushbu bilimlarni turli hayotiy, ilmiy-texnik masalalarni yechishda qo‘llay olish qobiliyatidir. Shuningdek, “Intellekt” deganda insonning barcha “kognitiv” qobiliyatlarini (idrok etish, eslash, fikrlash, tasavvur etish) va mavjud bilimlarini qo‘llagan holda “intellektual masalalarni” hamda muammolarni aqlan (ongda – miyoda) hal etish qobiliyati tushuniladi.