Доривор ўсимликлар ўзида одам ва ҳайвон организмларига таъсир қилувчи биологик фаол моддаларни сақловчи, тиббиёт мақсадида фойдаланиладиган ўсимликлардир. Дунё бўйича 21000 тур ўсимлик дориворлик хусусиятига эга. Айниқса халқ табобатида ишлатиладиган турларнинг сони кўп (араб, хинд, хитой, тибет тиббиётида). Тибет тиббиётида 400 га яқин тур ўсимлик ишлатилади. Ишлаб чиқариш саноати миқёсида ишлатиладиган доривор ўсимликлар доривор воситалар давлат реестрига киритилади. Уларда турли биологик фаол моддалар (БФМ) тўпланади (алкалоидлар, гликозидлар, витаминлар, аччиқ моддалар, ошловчи моддалар, полисахаридлар, флавоноидлар, эфир мойлари ва б.).