Tadqiqotning ilmiy yangiligi va dolzarbligi Ushbu tadqiqot ishida Alisher Navoiy “Arba’in” va Shayx Muslihiddin Mustafo Axtariyning “Qirq hadis” asarlarining mushtarak va farqli jihatlari bir-biriga qiyosiy jihatdan tadqiq qilindi. Axtariy asari haqida deyarli ma’lumot uchramaganligi uchun arba’inlarni tahlilga tortishda uning turkcha va o‘zbek tiliga o‘girilgan tarjima matnlaridan foydalanildi. Qolaversa, turkiy tilda yozilgan bu ikki asar matnidan kelib chiqqan holda yozilish sabablari, muqaddimadagi hamd va na’tlar, ta’kid hamda eslatmalar borasida ham o‘rganishlar olib borildi. Hadislarning tanlanishi, o‘xshash hadislarning she’riy sharhlardagi farqlari, asar strukturasiga oid tahliliy xulosalar keltirildi. Asarlarning ilmiy-badiiy, ta’limiy-tarbiyaviy ahamiyati ko‘rsatib berildi hamda joiz o‘rinlarda falsafiy, tasavvufiy jihatlariga ham e’tibor qaratildi.