“Ilhom” mukofoti shoir va yozuvchilar hayoti hamda ijodini o‘rganish, ularning asarlarini tarjima qilish, ilmiy-ijodiy va ma’naviy-ma’rifiy jarayonlarda eng yuqori natijalarga erishgan oliy ta’lim muassasalari talaba va yoshlariga taqdim etiladi. Mukofot adabiyotga qiziqishni oshirish, kitob o‘qishga da’vat etish, vatanparvarlik tuyg‘ularini yuksaltirish hamda yoshlarning iste’dodi va ijodiy qobiliyatini rag‘batlantirish maqsadida tashkil etilgan. Tanlov oliy ta’lim muassasalarida o‘tkazilib, g‘oliblarga maxsus diplom, pul mukofoti va 1-o‘rin uchun “Spark” avtomobili topshiriladi. Mukofot yil sayin 20-may kuni “Katta adabiyot bayrami” haftaligida taqdirlanadi.