Ахборот – бутун жамият учун ҳаётий заруратдир. Кишилар ўзаро кундалик мулоқотда ахборот алмашадилар. Маълум муддатда ўзлари кўрмаган, шоҳиди бўлмаган воқеликдан хабардор бўладилар. Худди шунингдек ўзлари кўрган, гувоҳи бўлган воқеа-ҳодисалар ҳақида ахборот берадилар. Бу – ахборотнинг энг содда кўринишидир. Чунки жамият мавжуд экан, унинг мазмунини ўзаро алоқа (коммуникация), ўзаро муносабатлар ташкил қилади. Ана шу жараёнларда ахборот алмашинади. Аммо бундай ахборотлар стихияли характерга эга бўлиб унда алоқага киришган томонларгина манфаатдор бўлади. Ҳаммага тааллуқли бўлган ахборотни эса у билан махсус шуғулланувчи кишилар – журналистлар тайёрлайди ва оммавий ахборот воситалари орқали оммага, аудиторияга етказиб беради.