Elektr maydoni materiyaning ko‟rinishlaridan biridir. Shu maydonda turgan elektr zaryadlariga maydon tomonidan kuch ta‟siri vujudga keladi. Biologik to‟qimalarda hosil bo‟ladigan elektr maydonning xossalari organizm holati haqida axborot beradi. Qadim zamondan shoyiga ishqalangan qahrabo o‟ziga mayda buyumlarni tortishi aniqlangan. Hozirgi vaqtda hamma moddalar tarkibida ikki xil zaryad bo‟lishi mumkinligi aniqlangan. Teriga ishqalangan shishada paydo bo‟lgan zaryad musbat, movutga ishqalangan ebonitda paydo bo‟lgan zaryad manfiy bo‟ladi. Bir xil ishorali zaryadlar o‟zaro itarishadi, turli xillari esa tortishadi.