Oqsillar almashinuvi. Oqsillar organizmda xilma-xil funksiyani bajaradi. Ular hujayraning asosiy qurilish materiali bo‘lib, hujayra organoidlari ham oqsillardan iborat. Hujayrada boradigan barcha kimyoviy reaksiyalarni oqsillar katalizlaydi. Immunitet hosil bo‘lishi, muskullarning qisqarishi va fermentli jarayonlar oqsillar bilan bog‘liq. Oqsillar orqali kislorod to‘qimalarga olib boriladi; karbonat angidrid to‘qimalardan olib ketiladi. Hujayrada sodir boradigan ko‘pchilik jarayonlar oqsillar bilan bog‘liq. Oqsillar tarkibiga 20 xil aminokislotalar kiradi. Ularning o‘zaro kombinatsiyasi natijasida xilma-xil oqsil molekulalari hosil bo‘ladi. Oqsillar ko‘pchilik o‘simlik va hayvon mahsulotlarida bo‘ladi. Ovqat hazm qilish naylarida oqsillar aminokislotalarga parchalanib, qonga o‘tadi.