Daryo qisqichbaqasi deyarli hamma joylardagi chuchuk suv havzalarida keng tarqalgan. Uning tanasi yoshiga va jinsiga qarab 8-15 sm uzunlikda bo‘ladi. Qisqichbaqalar kunduz kunlari inlarida yashirinib, tunda esa faol harakat qiladi va ovqat izlaydi. Ular har xil oziqlanadilar, ko‘pincha o‘limtiklarni, mayda baliqlar, itbaliqlarni, shuningdek tarkibida ohak moddasi ko‘p bo‘lgan o‘simliklarni yeydi. Tanasi xitindan iborat kutikula bilan qoplangan bo‘lib, u boshko‘krak (cephalothorax) va qorin (abdomen) qismlariga bo‘linadi. Boshko‘krak qismi umumiy qalqon-karapaks bilan qoplangan. U boshining oldingi qismida uchli o‘simta-rostrum hosil qiladi. Ko‘krakning ikkala yon tomonida esa karapaks jabra bo‘shlig‘ini qoplab turadi.