Sachratqi (Cichorium intybus) – Asteraceae oilasiga kiruvchi, urchuqsimon, ko‘p yillik o‘simlik bo‘lib, uning ildizi va yer usti qismi turli dorivor va biokimyoviy xususiyatlarga ega. O‘simlikning ildizida 60% gacha inulin, 10-20% fruktoza, intibin glikozidi, karotin, vitaminlar (B1, B2, B3, C), makro va mikroelementlar, organik kislotalar, taninlar, pektin, oqsil moddalar va smolalar mavjud. Sachratqi ildizidan farmatsevtika va oziq-ovqat sanoatida foydalaniladi, xususan metabolizm va ovqat hazm qilishni yaxshilashda yordam beradi. O‘simlik tarkibidagi endofit mikroorganizmlarning dorivorligi o‘rganilgan, ular bakteriyalar va kasallik keltiruvchi mikroorganizmlarga antagonistik ta’sir ko‘rsatadi. Sachratqi o‘simligining biotexnologik potensiali, genetik strukturasini tahlil qilish va dorivorlik xususiyatlarini o‘rganish uning farmakologik sifatlarini oshirish hamda biopreparatlar ishlab chiqarishda qo‘llanilishi yuzasidan muhim tadqiqot obyekti hisoblanadi.