Инсоният истеъмол қиладиган маҳсулотлар ичида энг харидоргири – ахборотдир. Ахборот технологияларнинг ривожланиши, интернетнинг пайдо бўлиши биринчидан-ахборотни тайёрлаш ва етказиш тезлигини бир неча баробар оширган бўлса, иккинчидан-уни қабул қилиш имкониятларини мислсиз даражада кенгайтириб юборди. Олимлар постиндустриал жамият назариясида ахборот қадриятдан товарга айланаркан, унинг сифати ҳам талаб даражасида ўзгариши табиий ҳоллиги таъкидлайдилар. Халқаро экспертларнинг ахборот ресурслари борган сари “фейк” хабарларга тўлиб бораётгани ва инсоният янги давр – пост ҳақиқат (post-truth) даврига ўтаётгани хусусидаги хавотирлари ўзини оқлади. Оксфорд луғатига кўра, “пост-ҳақиқат” ибораси 2016 йил атамаси сифатида эътироф этилди.