Иқтисодиѐт назарияси фанини ўрганиш, иқтисодий жараѐнларнинг туб моҳиятини тўғри тушуниш ва уни ўрганувчиларнинг маълум назарий ва услубий билим билан қуролланишига боғлиқ. Шунинг учун мазкур боб кишилик жамияти тараққийотининг асоси бўлган иқтисодиѐт тушунчасини, унинг олдида турган вазифаларни, узоқ давр давомида иқтисодий билимларнинг шаклланиши ва иқтисодиѐт назарияси фанининг вужудга келишини қисқача тавсифлаш билан бошланади. Иқтисодиѐт назарияси фанидаги асосий оқимлар ва назарияларнинг умумий баѐни берилади.