Zamonaviy rivojlanishning asosiy tendensiyalarida siyosiy, iqtisodiy, ijtimoiy, madaniy va boshqa tizimlarning integratsiyasi yaqqol sezilib, XX asrda dunyo bo‘ylab nafaqat bir mamlakat yoki mintaqa, balki jahon miqyosida integratsiya va globallashuv jarayoni rivojlandi. Bugungi kunda dunyo miqyosida va mintaqa ko’lamida integratsiya jarayonlari integratsion aktorlar yordamida jadal amalga oshirilmoqda. Mintaqaviy integratsiya, birinchi navbatda, mintaqa davlatlariga globallashuv muammolariga qarshi turishga, global liderlarning bosimiga dosh berishga; Ikkinchidan, bu jahon tovarlari, xizmatlari, texnologiyalari va mehnat bozorlarida global raqobat muhitida mintaqaviy imtiyozlarni yaratishga; Uchinchidan, ishlab chiqarish va marketing xarajatlarini pasayishi, tovar va xizmatlar ishlab chiqarishning ixtisoslashuvi va kooperatsiyasi milliy iqtisodiyotning jadal rivojlanishi hamda global muhitda raqobatbardoshlik qobiliyatining o’sishishiga imkon beradi. Markaziy Osiyo davlatlarining o‘zaro hamkorligini yanada rivojlantirish mintaqaviylik va milliy manfaatlar nuqtai nazaridan eng dolzarb masala hisoblanadi. Integratsiya borasida turli tashabbuslar, ichki va tashqi omillar mavjud bo‘lsada, davlatlarning barchasi ham dastlabki 25 yil davomida bunga juda katta xayrihohlik ko‘rsatmagan edi. Xususan, mintaqada asosiy ikki katta iqtisodiyotga ega bo‘lgan davlat O‘zbekiston va Qozog‘iston o‘zaro raqobat yo‘lidan ketgan bo‘lsa, Qirg‘iziston zo‘r berib, mamlakatda g‘arbona demokratiyani qaror toptirish va rivojlantirishga ahamiyat qaratdi. Tojikiston, endigina fuqarolar urushini bartaraf qilib, davlatchilik tuzilmalarini mustahkamlash va mamlakatning nochor iqtisodiyotini barqarorlashtirish yo‘lidan borgan bo‘lsa, Turkmaniston Afg‘onistondagi chigal vaziyatning mamlakatga ta’sir ko‘rsatmasligining oldini olish uchun chegaralar daxlsizligini ta’minlash va dastlab, Saparmurat Niyozovning, keyinchalik esa Gurbanguli Berdimuxamedovning yakka hokimiyatini yanada mustahkamlash masalasini asosiy vazifa sifatida belgiladi. Davlatlar va xalqlar o‘zaro bir butunligini anglab yetib, ichki integratsiyani vujudga keltirsagina, Markaziy Osiyo yaxlit jipslikka erishib, mukammal kuchga aylanadi. Integratsiyaning muhim nazariy masalasi bu – integratsiya jarayonida iqtisodiy va siyosiy omillarning o‘zaro munosabati hisoblanadi.