Sport metrologiyasi — bu jismoniy tarbiya va sport faoliyatidagi o‘lchashlar, ularning aniqligi va birligini ta’minlashga qaratilgan fan. U sportchining holati, trenirovka yuklamalari, mashqlar texnikasi, taktik tayyorgarlik, sport natijalari hamda sportchining musobaqalardagi xulq-atvorini majmuaviy nazorat qilishga ixtisoslashgan. Sport metrologiyasi boshqarish jarayoni sifatida sport mashgulotlarini, boshqarish tizimini va natijalarni baholashni o‘z ichiga oladi. Fan o‘lchashlarning o‘zgaruvchanligi, ko‘p o‘lchamliligi, sifatlilik va adaptivligi xususiyatlarini hisobga olgan holda ilg‘or metrologik usullar va o‘lchov asboblaridan foydalanishni o‘rgatadi. Maqsadi – sportchining yuksak yuklamalar fonida salomatligini saqlagan holda uning tayyorgarligini va faoliyatini samarali boshqarishdan iborat.