Maktabgacha ta’lim pedagogikasi bola tug‘ilganidan yetti yoshgacha bo‘lgan yoshdagi bolalarni jismoniy, aqliy, axloqiy, mehnat va estetik jihatdan har tomonlama rivojlantirishga xizmat qiladigan, nazariy, ilmiy va amaliy asoslarga ega bo‘lgan fan. Fan milliy va umuminsoniy qadriyatlarni birlashtirib, yosh avlodni barkamol inson qilib tarbiyalash, ta’lim va tarbiya samaradorligini oshirish, shuningdek, maktabgacha ta’lim muassasalarida ta’lim-tarbiya jarayonlarini tashkil etish metodlarini o‘rganishga qaratilgan. Fan doirasida ta’lim-tarbiya sohasidagi qonuniyatlar, metod va amaliyotlar, shuningdek, ilmiy tadqiqot metodlari, jumladan kuzatish, suhbat, pedagogik eksperiment va boshqalar o‘rganiladi.