Ushbu ishlab chiqilgan korreksion mashgʻulotlar ishlanmasi 10-11-sinf oʻquvchilari uchun moʻljallangan bo‘lib, voyaga yetmaganlarda addiktiv xulq-atvor turlari (kimyoviy va xulq-atvor qaramliklari), ularning sabablari va oldini olish bo‘yicha profilaktik tadbirlarni o‘z ichiga oladi. Ishlanma yoshlar orasida spirtli ichimliklar, nikotin, ruhiy holatni oʻzgartiruvchi moddalar, qimor o‘yinlari, kompyuter oʻyinlariga qaramlik, jinsiy qaramlik kabi ko‘plab addiktiv holatlar oldini olish maqsadida maktab psixologlarining malakalarini oshirish hamda o‘smirlarning psixologik immunitetini kuchaytirish, shaxsiy o‘sishni rejalashtirish ko‘nikmalarini shakllantirishga qaratilgan. Dastur yoshlarning o‘zligini anglashi va mustahkam shaxsiy pozitsiya egasi bo‘lishlarini rag‘batlantiradi, shuningdek bolalar va yoshlar o‘rtasida addiktiv xulq-atvorga moyillikni kamaytirishga xizmat qiladi.