Atoqli olim B. Ahmedov tadqiqotlarida “Istoriko-geograficheskaya literatura Sredney Azii XVI - XVIII vv.” (Pismennыye pamyatniki) monografiyasi alohida o’rin egallaydi. Ta’kidlash joizki, kitob sovet davrida yozilgan va muallif o’z davri mafkurasi, tadqiqot metodologiyasiga ergashgani tabiiy. K.Marks, F.Engelsdan iqtiboslar keltirilishi o’sha davr tadqiqot metodologiyasi mahsuli hisoblanadi. Monografiyada ellikdan ortiq fors va turkiy tildagi asarlar, shuningdek, XVI-XVIII asrlarda O’rta Osiyoga, jumladan, Buxoroga tashrif buyurgan rus elchilari va sayohatchilarining safar yozuvlari hamda hisobotlari tahlil qilingan. Ushbu asarlardan O’rta Osiyo o’zbeklari va boshqa xalqlarining ijtimoiy-iqtisodiy, siyosiy va madaniy hayoti, etnik tarixi, ularning Rossiya va boshqa mamlakatlar bilan siyosiy, savdo va madaniy munosabatlari haqidagi eng muhim ma’lumotlar to’plangan.