XIX asrga kelib Yevropa davlatlarining Afrika bilan munosabatlarida yangi tendensiyalar paydo bo‘ldi. Homashyo manbalari borgan sari ko‘prok ahamiyat kasb eta boshladi. Kapitalistik tuzumning genezisida muhim rol o‘ynagan qul savdosi bekor qilingandan so‘ng Yevropa davlatlarining harakatlari Afrika qit’asini bosib olish va mustamlakaga aylantirishga qaratildi. 1876 yilgacha yevropaliklar qit’aning faqat 10% i bosib olgan bo‘lib, bu asosan qirg‘oq bo‘ylaridagi tayanch punktlari edi. Afrikaning ichki hududlari bo‘yicha ma’lumotlar juda tarqoq va noaniq holda to‘plangan bo‘lib, XIX asrning boshlarida Yevropada Markaziy Afrika haqida juda kam tasavvurga ega edilar.