Aeroionoterapiya (aero… va yun. ion — keluvchi, terapiya) — havo ionlari bilan davolash usuli. Bunda maxsus asboblar — aeroionizatorlar ishlatiladi; ular yordamida havoda ko‘plab aeroionlar hosil qilinadi. Aeroionlar nafas yo‘llari va o‘pka alveolalaridagi o‘z konsentratsiyasi va zaryadiga qarab, o‘pka interoretseptorlari — sezuv nervi uchlarining qo‘zg‘aluvchanligini o‘zgartiradi. Bu yerda hosil bo‘lgan impulslar markazlariga boradi, so‘ngra a’zolarga tegishli signallar yetib keladi. Aeroionlar o‘pka alveolalari devoridan qonga o‘tib, o‘z zaryadini qon oqsillari va hujayra elementlariga beradi.