Umumiy yonbosh arteriyasi pastga va tashqariga yo‘nalib, dumg‘aza-yonbosh bo‘g‘imi sohasida ichki va tashqi yonbosh arteriyasiga bo‘linadi. Ichki yonbosh arteriyasi dumg‘aza-yonbosh bo‘g‘imidan oldingi medial tomonda yotadi. Kichik chanoq bo‘shlig‘iga yo‘nalib katta quymich teshigining yuqori chekkasida ichki yonbosh arteriyasi oldingi va orqa poyaga bo‘linadi. Orqa poyaning tarmoqlari qorin va chanoqning orqa devoriga va dumba sohasiga yo‘naladi. Oldingi poyaning tarmoqlari chanoq a’zolarini, oraliqni va dumba sohasini qon bilan ta’minlaydi.