Sariqlik sindromi bilan kechuvchi kasalliklar amaliyot vrachlari faoliyatida muhim o`rin tutadi. Sariqlik sindromi bilan kechuvchi kasalliklar bilirubin almashinuvi buzilishiga bog’liq va bog’liq bo`lmaganligiga asosan ikki guruhga bo`linadi. Bilirubin almashinuviga bog’liq sariqlikni qiyoslash juda murakkabdir. Amaliyot shuni ko`rsatadiki, 10-15% holatlarda toshli va toshsiz xoletsistit virusli gepatit tashxisi bilan kasalxonaga tushadi. 50-60 yoshli bemorlarda virusli gepatitlarni o`sma kasalliklaridan qiyoslash ancha muhim. Vrach bemorda sariqlikni kuzatganda, albatta birinchi navbatda jigar usti, jigar osti hamda parenximatoz sariqliklarni qiyoslab, klinik tashxis qo`yib, davo choralarini belgilashi maqsadga muvofiqdir.