РНК- ва ДНК-сақловчи вируслар облигат ҳужайра ичи паразитлар ҳисобланади. Вирусга қарши воситалар вирус ва ҳужайра ўзаро таъсирлашувининг турли босқичларига таъсир қилиш хусусиятига эга. ДНК-сақловчи вируслар (герпесвирус, поксвирус, гепаднавируслар) ва РНК-сақловчи вирусларга (грипп вируси, ортомиксовируслар, парамиксовирус, ретровируслар) қарши самарадорликка эга дорилар фарқланади. Ушбу моддалар специфик таъсирли воситалар ҳисобланади. Носпецифик таъсирга эга бўлган бирикмалар (интерферонлар, интерферон индукторлари) ҳам муҳим антивирал фаоллик намоён қилади.