Miloddan avvalgi VI asrning ikkinchi yarmida Eron sharqning eng qudratli davlatiga aylanadi. Eron qo`shinlari Yunonistonning qora, Marmar va Egey dengizlari sohillaridagi mustamlakalarini, ular orasidagi yo`llarni va undagi bo`g`ozlarni ham egallaganlar. Bu bilan eronliklar Yunonistonning qora dengiz sohillaridagi xalqlar bilan aloqasini uzib qo`yganlar. Eron qo`shinlari ilgariroq Misrni ham zabt etgan edi. Natijada qora dengiz va Misr tomondan Yunonistonga kelib turadigan g`alla va boshqa mahsulotlar kelmay qo`ygan. Eron qo`shinlari Egey dengizidagi orollarning ko`pchiligini, shuningdek uning shimolidagi yerlarni ham istilo qilganlar. Yunoniston sharq va shimoli-sharq tomondan dushman bosqini xavfi ostida qolgan.