Кўндаланг кесимини катталаштириш орқали темирбетон конструкцияларни кучайтириш Темирбетон элементларни кучайтириш учун ҳисоблаш ва конструктивлаш тартиблари [ҚМҚ 2.03.01-96] да келтирилган. Агар кучайтириш ҳисоблари лойиҳада келтирилган маълумотлар асосида бажариладиган бўлиб, лойиҳада бетонни сиқилишга бўлган мустаҳкамлиги маркада келтирилган бўлса, бетонни сиқилишга бўлган мустаҳкамлиги бўйича шартли синфини аниқлаш лозим бўлади. Бетонни сиқилишга бўлган мустаҳкамлиги бўйича шартли синфи мос ҳолдаги бетон маркасига тўғри келган кубик мустаҳкамликни 80% қабул қилинади. Масалан, М200 маркали бетонни синфини аниқлаймиз М200: 0,8·200·0,1=16 МПа. Бизга маълумки бетонни сиқилишга бўлган мустаҳкамлиги бўйича маркасини ўлчов бирлиги сантиметр квадратга тўғри келган килограммларда (кг/см2) берилган, шунинг учун ҳисобдаги 0,1 миқдор МПа га ўтиш коэффициенти ҳисобланади. Агар техник текширув давомида бетонни ҳақиқий мустаҳкамлиги аниқланган бўлса, бу ҳолда ҳам бетоннинг шартли синфи миқдори аниқланган бетон мустаҳкамлигини 80% қабул қилинади. Техник текширув давомида бетонни хақиқий мустаҳкамлиги бузмасдан синаш усуллари ёки қирқиб олинган намуналарни синаш орқали аниқланади.