📓 NAZORAT IMPERIYASI: Sun’iy intellekt texnologiyalari va global tahdid Yangi reallik Mustaqil jurnalist, bestseller muallifi va Declassified Australia tashkilotining hammuassisi Entoni Lovenshteyn (Antony Loewenstein) Isroil urushlarni yolg‘iz olib bormayotganini, balki uni moliyalashtiradigan, qurollantiradigan va javobgarlikdan himoya qiladigan kuchli xorijiy o‘yinchilarning ko‘magiga tayanayotganini tushuntiradi. Gʻarb hukumatlari milliardlab qurol-yarog‘ va diplomatik himoya taqdim etayotgan bo‘lsa-da, Lovenshteynning fikricha, Isroil harbiy mashinasi ortidagi korporativ manfaatlar ko‘lami yetarlicha tushunilmagan. Google, Microsoft va Amazon kabi texnologik gigantlar Isroilning harbiy-sanoat majmuasiga chuqur kirib borgan bo‘lib, falastinliklarga qarshi ommaviy kuzatuv va urushni ta’minlaydigan sun’iy aql (AI) vositalari va bulutli infratuzilmani yetkazib bermoqda. Foyda va mafkuraviy uyg‘unlik asosida qurilgan bu hamkorlik Gʻazoni ilg‘or harbiy texnologiyalarni sinash maydoniga aylantirdi. Biroq Lovenshteyn ogohlantirganidek, bu faqat falastinliklar bilan cheklanib qolmaydi. Uning ta’kidlashicha, Isroil butun jamoalarni sun’iy aql yordamida samarali nazorat qilish va bo‘ysundirish, bunda deyarli hech qanday javobgarlikka tortilmaslik usulini namoyish etdi. Dunyo bo‘ylab hukumatlar bu usullarni takrorlashga intilayotgan bir paytda, zaif aholi qatlamlari uchun xavf yanada ortmoqda. Lovenshteyn xulosa qilishicha, Isroilning raqamli urush modelining nazoratsiz tarqalishi nafaqat falastinliklar, balki butun dunyo uchun tahdid hisoblanadi. - Jamshid Muslimov