Kindik, kindik tizimchasi-odam va platsentali sut emizuvchi hayvonlarda homilani ona organizmi bilan bog'lab turadigan (platsenta orqali) tizimchasimon anatomik tuzilma, a'zo; tarkibida qon tomirlar, allotois yo'li va hokazo bo'ladi. Kindik orqali homila - platsenta qon aylanishi ro'y beradi. Asosan, dirildoq to'qimadan tuzilgan, undan ikki arteriya va bitta vena o'tadi. Bola tug'ilgach, Kindik halqasi yaqinidan bog’ib turib qirqiladi, uning qoldig'i esa tez qurib, bola 5-7 kunligidayoq tushib ketadi. Tozalikka rioya qilinmasa, Kindik orqali infeksiya kirib, yara, kindik sepsisi va boshqa kasalliklar ro'y berishi mumkin. Kindik tezda bitmasa yoki chandig'i noto'g'ri shakllansa, vrachga murojaat qilish kerak.