Tibbiyot va kimyo fanlarining uyg‘unlashuvi inson salomatligini tiklash va turli kasalliklarni davolashda katta ahamiyat kasb etadi. Dializ va gemodializ – bu ikki fan o‘rtasidagi yaqin hamkorlikni namoyon etuvchi jarayonlar bo‘lib, ular nafaqat nazariy, balki amaliy jihatdan ham hayotiy muhim ahamiyatga ega. Ayniqsa, buyrak yetishmovchiligi va toksik moddalar bilan zaharlanish holatlarida gemodializ zamonaviy tibbiyotning ajralmas qismiga aylangan. Kolloid sistemalar kimyo fanining murakkab va keng ko‘lamli bo‘limi bo‘lib, ularning dializ yo‘li bilan tozalash texnologiyasi biokimyo va tibbiyotda muhim qo‘llanmalarga ega. Kolloid sistemalar tarkibidagi zarrachalar hajmi, ularning yarim o‘tkazuvchan membranalar orqali ajratilishi va muvozanatga keltirilishi dializ jarayonining nazariy asoslarini tashkil qiladi. Bunday jarayonlarning asoslari XVIII asr oxiri va XIX asr boshida kashf etilgan bo‘lsa-da, zamonaviy ilm-fan va texnologiyalar bu usullarni yangi bosqichga olib chiqdi. Gemodializning ishlash prinsipi yarim o‘tkazuvchan membranalar orqali qon va dializat o‘rtasida moddalar almashinuvi jarayoniga asoslanadi. Bu jarayonda qon tarkibidagi zararli moddalar, masalan, ortiqcha elektrolitlar va azot moddalari dializatga o‘tadi va organizm toksik yukdan xalos bo‘ladi. Ushbu jarayonni muvaffaqiyatli amalga oshirishda kimyo fanining ahamiyati beqiyosdir. Dializat eritmalarining tarkibini to‘g‘ri tayyorlash, pH darajasini muvozanatda saqlash va ion konsentratsiyasini nazorat qilish jarayoni aniq ilmiy yondashuvni talab qiladi.