Revmatik va biriktiruvchi to'qimaning tizimli kasalliklari zamonaviy tibbiyotning muhim muammolaridan biri hisoblanadi. Ularning birinchi guruhi bevosita bemor o'limiga sabab bo'lmasa ham aksariyat hollarda ichki a'zolarning zararlanishi bilan kechib, ularning ish qobiliyati yo'qolishiga, nogiron bo'lib qolishiga va umrining qisqarishiga olib keladi. So'nggi ma'lumotlarga koʻra, revmatik kasalliklar turli yoshdagi aholining 20-45% da uchraydi va bemorlar-ning 6-10% nogiron bo'lib qoladi. Katta yoshdagilarda ular bo'g'im va uning tog'ay to'qimalaridagi distrofik o'zgarishlar bilan kechsa, yoshlarda bo'g'imdagi o'zgarishlar ko'p hollarda yomon oqibatlarga olib keluvchi biriktiruvchi to'qima tizimli kasalliklarining (BTTK) bir belgisi sifatida namoyon bo'ladi. So'nggi guruh kasalliklari biriktiruvchi to'qima va uning hosilalarining tizimli autoimmun yallig'lanishi va klinik polimorfizm hamda polisindromal ko'rinishda kechadi. Ular patologik jarayonning tez rivo-jlanishi va ichki a'zolarda og'ir o'zgarishlar bilan alohida ajralib turadi. Suyak-mushak va biriktiruvchi to'qimaning tizimli kasalliklarini bayon qilishdan oldin quyida ularning anatomik tuzilishi va fiziologi-yasiga qisqacha to'xtalib o'tamiz.